|
الأحصائيات |
| عدد زوار الحالي:9
عدد زوار اليوم:1053
عدد زوار الشهر:48521
عدد زوار السنة:227270
عدد الزوار الأجمالي:1413750
|
|
البريد الالكتروني |
|
|
|
في علم البلالا |
 في علم البلالا
مكتوبة الشطارة
في وش الشيكارة
بانك هتبني
في مخ العمارة
فتسبح بسيخك
و ترمي في اساسك
مجرد حجارة
فتعلى و تعلى
بكل المهابة
وتفرط في زرعك
ونوعك وجنسك
وتبقى في نهايتك
يدوب للتجارة
فيبعك مهندس
و يدوسك مدرس
و يستولى عليهم
مبيض محارة
في علم البلالا
تلاقي تاريخك
في معرض اساس
و حاضر بيعلن
بانك جهاز
في حضرة مشاعرك
وعلى راسك مداس
لكل اللي شيلته
على ضهرك سنين
لانه ولأنك
في علم الحنين
منافع لحضرة
معالي الغفير
في علم البلالا
يدوب تستخبى
لو صاحب كتاب
او حتى بتقرا
وتكتب جواب
لان اللي زيك
مصيره الضباب
من نفخة معالي
سعادة الهباب
فتسمر كعابك
و تقوله جنابك
مخطئ لانك
سمحت لظنك
يظن ان ظنه
هيقبل عتاب
فتبوس المداس
وتقوله بحماس
يا بايع صحابك
واهلك و ناسك
كسبت بنجاسه
علوم الرجال
لان في علم علوم البلالا
سعاتك هتبقى
زعيم الكلاب
في علم البلالا
تملي استحالة
يظهر و ينجح
شاعر مقام
في وسط القذارة
تملئ البلالا
هتنتج سفالة
وجهل وغياب
لكل اللي رافع
راية حضارة
وكل اللي شايل
في قلبه الشهامة
وكل اللي ممكن
يمطر سحاب
في علم البلالا
يدوب تستخبى
و تدفن في راسك
زي النعام
لان بصراحة
علم البلالا
هيقطع في راسك
و يقول بانتحاب
ارسطو مثالك
خد ايه جنابك
غير أنه أعدم
بمنطق بلالا
و عزة و سعاد
والعلم مفتح
علي كل المصارع
فصارع ساعدتك
وانسى الهجاء
لان علومك
مبقتش حياة
وحمو وبيكا
شاكوش الغناء
رموز العلوم و الفنون و الاداب
فاقفل كتابك
وامسح جوابك
و اتفرج و صقف
ثقافة البتاع
حسين راشد
أرسلت بواسطة: أدارة الموقع | التاريخ: 29-07-2023 | الوقـت: 10:29:14 مساءا |
|
المواضيع المرتبطة بهذا المقال
|
|
التصويت على المقال
| المعدل: |  | عدد المصوتين: | 0 |
|
|
|
|
