عنوان الصفحة يريد نعود محتوى الصفحة
ابو رافد المياحي
يريد نعود گلبي ..وگلت منعود
للباگو عنبها..ويبس بيها العود
شواطيها أذبلت...
وتبدل رملها الناعم بجلمود
الشلب عطشان ..والعنبر نسمعه يصيح
شوك البر غزاني..وحشم الصيهود
ودجله الچان يكرم..طرد الخطار
ونسد المظيف..وبطل من الجود
ظل البيت للسربوت...
والدايح ملك..والحاكم النمرود
تمشي بيامتاهه ويابحر ظلمات
ماتندل طريقك..والافق مسدود
المهدم..واللازم سره..والمشتعله بيه النار
والام والطفل..خانگهم البارود
وين اهل الشيم والغيره والنوماس
وين ابن التفگ..وعگاله فوگ الراس
بهيده وبتأني..لو جمعت انقاض
بيها مگطعات زنود
بيها عيون مطفيات..بيها مشوهات نهود
وتراب القنابل..ماخلى حلوه خدود
الحرب اقبح وجه مرسوم بالتاريخ
على طول الزمن ..والسبايا شهود
يريد نعود گلبي...بعد هذا الخراب تعود
خليني بحلم غافي..اريد ارتاح
حتى انسى الليالي الكالحات السود
واحنه ظيوف..سنتين وبعدنه ظيوف
لا واحد نشدنه منين..ليش هناه..
غربه والامل موجود..غربه والامل موجود
|