ابو رافد المياحي
ضاع العمر..
صبر بصبر..
ويصح گلب مثل الحجر
يحمل من الله شگد قهر
ياريت لو مثل الشجر
يورد بزخات المطر
والعلمونه..شعلمونه
النعمه دامت بالشكر
وماعدنه نعمه ولا بطر
وچن العمر مابيه زغر
ولا سمع نغمه ولا شعر
النعمه ياخذها القصر
والكوخ بس حصته الفقر
موحش واشبه بالگبر
والشيخ بالسطوه نسر
قمام مايترك اثر
وك..ياشكر
كلها عسر
حفاي شفناها الزلم
والموت يمشي بكل كتر
ويجيب وياه الكفر
وحسين يبقى بغربته
ويبقى الشمر ذاك الشمر
في كل بلاد وكل عصر
في كل بلاد وكل عصر
أرسلت بواسطة: أدارة الموقع | التاريخ: 09-11-2017 | الوقـت: 11:36:16 مساءا |
|
