ينفع لو في عمرين
او بدل الحياه حياتين
او في مننا نسختين
او لو كان في عمله
ممكن تشتريلنا سنين
مفيش بعدين
علي الطريق
ادبدر حب السنين
محتاج
قرنين
عشان يتلم
انتي الفريق
باللون الاحمر
في كورات
الدم
يا اميره مملكه الحلم
انا والليل
والشعر وصورتك والاغاني ري بالتنقيط
واحساسي انك مش عشاني عمل جرح بسيط
بطول النيل
وانا عايز بسرعه
اعوض زماني
والف الدنيا
في منديل
انا عارف بتقولي جنان
حبيبتي انا انسان عايش احساس
اخر دقيقه في الامتحان
وبسمع في اللجنه صوت
باقي من الزمن تكه
وباقي من القلوب دقه
وانا مكتبتش غير اسمي علي الورقه
وضاع الوقت وانا سرحان برسم عين
مفيش بعدين
اصدق كلام ممكن تسمعيه
من اللي قلوله يومين وتموت
ومعندوش اللي يبكي عليه
هيكدب ليه
احسن حاجه ممكن تشتريها
من واحد كان قلبه فيها وباعها
والدموع
في عنيه
وهو دة انا
اصدق عاشق ممكن تشفيه
انا واحد
خالف جماعته
وجمع شجاعته
وجالك لعندك يقلك بحبك
وكفن قلبه علي اديه
في كل الوقت اللي فات
بيدور في المحارات
علي لؤلؤه ست البنات
وجواه حاجه تملي تقوله
انها ليه
تفتكري دة ايه
في سينما الحياه حجزت vip
تذكرتين
فيلمينا هيبدء كمان
ساعتين
مش ممكن
نتاخر عشان
مفيش بعدين
...............
بيتر سمير
أرسلت بواسطة: أدارة الموقع | التاريخ: 17-05-2020 | الوقـت: 05:20:37 مساءا |
|